ஹோம் இம்ப்ரூவ்மெண்ட் : பகுதி 1

ஒரு வீட்டைக் கட்டி முடிச்சோம். குடி போனோம் என்றதோடு வீட்டுவேலைகள் ஏதும் முடிவடைவதில்லை. என்னதான் திட்டம் போட்டுக் கட்டி முடிச்சாலும், அங்கே போய் வசிக்கத் தொடங்கின பிறகுதான்.... இது இன்னும் கொஞ்சம் நல்லா இருந்துருக்கலாம். இந்த இடத்தில் இப்படி இருந்தால் தேவலை.  கட்டும்போதே  இதைக் கவனிக்கத் தவறிட்டோம், பாருங்கன்னு பலதும் தோன்றும்.

வீட்டுக்குள் வெளிச்சம் போதலைன்னு ஆரம்பிச்சேன்.  நம்மது ஓப்பன் கிச்சன், டைனிங்ன்னு லிவிங் ஏரியா  கொஞ்சம் பெருசுதான்.  கண்ணாடிக் கதவெல்லாம்   யூவியைத் தடுக்க டபுள் க்ளேஸ்ட் & டின்ட்டட். அதனால் கிடைக்கும் வெளிச்சம், கொஞ்சம் மங்கல். குளிர்காற்றுக்குப் பயந்து கதவை எப்போதும் மூடியே வேற வைக்கிறோம்.

Sky lights வகையில்   Solatube போட்டுக்கலாமுன்னு முடிவாச்சு.

 சம்பந்தப்பட்டவர்களிடம் சொன்னதும்   ஸோலாட்யூப்  போட வேண்டிய ஏரியாவை அளந்து என்ன சைஸ் சரியா இருக்குமுன்னு பார்க்க ஒருத்தர் வந்தார். அளந்தார். போனார்.

என்னிக்கு வரப் போறாங்கன்னு  சேதி கிடைச்சது.  மழை இல்லாத நாளா இருக்கணுமேன்னு வேண்டினேன். பெருமாள்  க்ருபை  காமிச்சார்.

குறிப்பிட்ட நாள் ரெண்டு பேர் வந்து சரசரன்னு வேலையை ஆரம்பிச்சாங்க.  வடக்குப் பார்த்த கூரையில்  ஒரு பெரிய துளையும், நமக்கு வெளிச்சம் வேண்டிய இடத்தில் (கூடத்தில்) ஒரு துளையும் போட்டாங்க. உலகின் தென் கோளம் என்பதால் வடக்குதான் இங்கெல்லாம் விசேஷம். சூரிய வெளிச்சம் வடக்கில்தான் கிடைக்கும்.

கூரைக்கும் , சீலிங்குக்கும்  நேரான குழாய் துண்டு சின்ன  சைஸில்,  ரெண்டு துளைகளையும் இணைச்சு. பெரிய  ஸ்டெய்ன்லெஸ் ஸ்டீல் குழாய்  ஒரு கோணத்தில்  வச்சு  அதை  ரெண்டு நேர்குழாயில்  பொருத்திட்டாங்க.  இந்தக் குழாய்களின்  உட்புறம் பாதரசம் பூசுனாப்போல ஒரு கோட்டிங்.அப்படியே முகம் பார்க்கும் கண்ணாடி போல் ஜொலிப்பு.  குழாய்கள் சேரும் இடத்தில்   இதைவிட மினு மினுக்கும்  ஒரு  வட்டமான தகடு.

வடக்குக் கூரைத் துளையின் மேல் உருண்டையான  ஒரு   பெரிய கண்ணாடி கிண்ணம் போன்ற  அமைப்பைப் பொருத்துனாங்க. சூரிய வெளிச்சம்  அதன் மூலமாக  குழாய்க்குள்  வந்து, அங்கிருக்கும் பிரதிபலிப்பான்கள் மூலம் அந்த வெளிச்சம் வீட்டுக்குள்ளே வருது. ஸீலிங் பகுதியில்  இருக்கும் துளையில்  'சள்' என்ற வெளிச்சத்தைக் குறைக்கும் டிஃப்யூசர் போல ஒரு பெரிய  குழித்தட்டு. அதைப் பொருத்தியதும்  கூடம் முழுசும் பளிச்!

நமக்கு  விருப்பம் என்றால்  இந்த  ஸீலிங் குழித்தட்டை,  ஜன்னல் திரை போல் மூடித் திறக்க  ஒரு  ஸ்விட்ச் பொருத்தியும் தருவாங்க.  மின்சார இணைப்புக் கொடுக்க எலக்ட்ரீஷியன்  செலவு எக்ஸ்ட்ரா.  அதெல்லாம்  இப்போதைக்கு வேணாமுன்னு சொன்னோம்.  எவ்ளோ வெளிச்சம், எப்படி இருக்குமுன்னு பார்த்துட்டு முடிவு செய்யலாம்.

எல்லா வேலையும் ஒரு ரெண்டு மணி நேரத்துக்குள் முடிஞ்சு போச்சு.   நம்ம  கோகி (கோபால க்ரிஷ்ணன்) அப்போ இருந்தான். வெளிச்சம் போதுமான்னு செக் பண்ண உதவி செஞ்சான்:-)


இதுவே வீடு கட்டி முடிச்சு நாலு வருசம் கழிச்சுத்தான்.  அதுவரை குற்றம் கண்டு பிடிச்சுக்கிட்டு  இருந்தேன். எனக்கு  இந்தத் துறையில்  வல்லமை அதிகமுன்னு கோபால் சொல்றார்! கில்லாடியாம்:-)))) அடுத்த குற்றம் கண்டுபிடிக்க ஆரம்பிச்சேன்.

அடுத்த  ப்ராஜெக்ட்டா     ஒரு ஆட்டிக் லேடர். பரண் ஏணி. வீடு கட்டும்போதே  மேற்கூரைக்கும்  ஸீலிங்குக்கும் இடையில் உள்ள  இடத்துக்குப் போக   ஒரு  வழி அமைச்சுத்தான் இருக்கு.  அவரவர் சௌகரியத்தின் படி இந்த  வழியை  எந்த அறையில் வேணுமானாலும்  வச்சுக்கலாம்.  நம்ம வீட்டில் இதை  கராஜ் ஸீலிங்கில்  போடச் சொன்னோம்.  இதன் வழியா  மேலேறிப் போக ஏணியைப் பயன்படுத்திக்கலாம்.  கூரையில் பழுது பார்க்கணுமுன்னா இதன் வழியா ஏறிப்போகணும்.  இந்த இடம்  வீட்டின் மொத்த பரப்பளவு சைஸ்தான்.  தாராளமா அங்கே ரெண்டு ரூம் கூடப் போட்டுக்கலாம்.

 நடுப்பகுதி நல்ல உயரமாத்தான் இருக்கும்.  வீடு கட்டும்போது ஸீலிங் பகுதியில் மரத்தண்டுகளால்  கட்டம்கட்டமா  அடிச்சு வைப்பாங்க.  இந்தக் கட்டத்துக்கு அடியில் (வீட்டின் உட்புறம்)  ஸீலிங்  வரும். இதுக்குன்னு தனி வகை ஜிப் போர்டுகளுண்டு.  பரணில்  இருக்கும் கட்டங்களில்  பிங்க்பேட் என்னும் கண்ணாடி இழை நுரைப் பஞ்சு நிரப்பி வைக்கணும். இது வீட்டுக்குள்ளில் இருக்கும் வெப்பம் வெளியேபோகாமல் தடுக்கும்.  குளிர் நாடுகளுக்கு இதெல்லாம் அவசியம். (இதை நம்ம வீடு வா வாங்குது தொடரில் எழுதி இருக்கேன்)

இந்த நுரைப்பஞ்சுக்கும்  ஸீலிங் போர்டுக்கும் நடுவில் ஸாண்ட்விச் போல கட்டங்கட்டமா  இருக்கும் மரத்தண்டுகள். (சரியா விளக்கி இருக்கேனான்னு தெரியலை!) ஆனாலும்  மரத்தண்டுகள் நம் பார்வைக்குப் புலப்படும் வகையே!

   வெளிநாடுகளில் வசிக்கும் நம்மவர்களுக்குப்  பயணம் போக பெரிய பெரிய பெட்டிகள் வேண்டித்தான் கிடக்கு.  அதிலும் கோபால் வேலை விஷயமா பொழுதன்னிக்கும் வெளிநாட்டுப்  பயணம் போய்  வர்றவர்.  அவருக்கு என்னன்னா.....  எத்தனைநாள் பயணமோ அதுக்கு ஏத்தமாதிரி பொட்டிகள் வேணுமாம். ரெண்டு நாளைக்குப் போகும் போது கொண்டு போகும் பொட்டியை ஒரு நாள் பயணத்துக்குக் கொண்டு போக முடியாதாம். அதனால் நம்மூட்டில்   ஒரு நாள்முதல் 365 நாள்வரைக்குமான ( ஒரு பேச்சுக்குச் சொல்றேன்!) வகைவகையான  அளவில் பெட்டிகள் நிறைஞ்சு போய்  எல்லா அறைகளையும் நிரப்பிக்கிட்டு இருக்கே. அதையெல்லாம் பரணில் அடுக்கி  வச்சுக்கிட்டால் தேவையான போது எடுத்துக்கலாம் தானே!

மேலே  இடம் இருக்கு. ஆனால்  இப்ப இருக்கும்  'இந்த ஏணி'யை நம்பி  பொட்டியோடு ஏறக்கூடாதுன்னு  சொன்னேன்.  ஏற்கெனவே விழுந்து  தோள் மூட்டு இடம்பெயர்ந்து  ஆம்புலன்ஸில்  ஆஸ்பத்திருக்கு ஓடுனதெல்லாம் வரலாறு. (கொசுவத்தி ஏத்திக்கிச்சே!)

வீட்டுக்குள்  நிறைய இடம் இருந்தால் நிரந்தரமான படிக்கட்டுகளே கூட கட்டிக்க ஆசைதான்.    மாடிக்குப் போவதைப்போல் போய் வரலாம். என் மாடி வீட்டு ஆசையும் ஒரு மாதிரி நிறைவேறும். இப்ப காராஜில் அவ்ளோ இடமில்லை.

ஆட்டிக் லேடர் போட முடிவாச்சு. வேணும்போது படிகளை இழுத்துக்கலாம்.  புல்டௌன் மாடல்:-)

அதற்கான  ஏற்பாடுகள் ஆரம்பிச்சோம்.  இது  நம் இந்திய வாசம் முடிஞ்சு  நியூஸி திரும்பின பிறகு 2011 இல்.  பெட்டிகளின் எண்ணிக்கை கூடுனது அப்பதானே:-))))


சுபயோக சுபதினத்தில் ரெண்டு பேர் வந்தாங்க. அதுலே ஒருத்தர்  நாலு வருசம் முன்பு ஸோலாட்யூப் போட வந்தவராக இருந்தார்!

ரெடிமேட் கிட் கொண்டுவந்துருந்தாங்க. ஏற்கெனவே  பரணுக்கு இருந்த திறப்பு சின்ன  சைஸ். ஜஸ்ட் ஒரு ஆள் உள்ளே நுழைய முடியும் அளவுதான்.  இப்பப் படிகள் இணைக்க இன்னும் கொஞ்சம் நீளமா வேணுமுன்னு  அந்தத் திறப்பை இன்னும் கொஞ்சம் வெட்டி எடுத்தாங்க.

புதுசாக் கையோடு கொண்டு வந்த ஃப்ரேமைப் பொருத்தி, அதற்குப் பொருத்தமான மரக்கதவை இணைச்சாங்க.  அந்த மரக்கதவிலேயே  ஏணிப் படிகளை இணைச்சாங்க. மடக்கு ஏணி.  ரெண்டாய் மடங்குது.  முதல் பாதி கதவோடு சேர்த்தே  இருக்கு இப்போ. கதவைத் திறந்து  அது கீழே வந்ததும்  அடிப்பாகத்தில் மடங்கி இருக்கும் ஏணியை இழுத்தால் அதுதரை  தொடும்.

அதேபோல  மூடும்போது ஏணியை மடிச்சுட்டுக் கதவை அதற்கான கம்பி கொண்டு மூடிறலாம்.  நல்ல கம்பிதான். மடித்துணி  உலர்த்தப் பயன்படும்  கழி நினைவுக்கு வந்துச்சு.

வெளிச்சத்துக்காக உள்ளே ஒரு லைட்டும் போட்டுக்கிட்டோம். இப்ப எல்லாக் கண்டா முண்டா சாமான்களும்  மாடியில்:-))

ஏறி எடுக்கும்போது  கவனமா மரச்சட்டத்தில் காலை வச்சு நடக்கணும். தெரியாத்தனமா பிங்க் பேட்டில் காலை வச்சோமோ......   போச்!

இப்ப  கனம் குறைஞ்ச உறுதியான மரப்பலகைகளைத் தேடிக்கிட்டு இருக்கோம்.  இப்பெல்லாம் எனக்கு, சூப்பர் மார்கெட்டை விட ஹார்ட் வேர் ஸ்டோர் ரொம்பப் பிடிச்ச இடமா ஆகிக்கிடக்கு. டைம்பாஸுக்கு ஏற்ற  இடம்:-)

சட்டங்களுக்கு மேல் பலகை அடிச்சுட்டால்....  பயமில்லாம நடக்கலாம் பாருங்க! (அதான் கார்ட்லெஸ் ஸ்க்ரூ ட்ரைவர், சாண்ட்டா கொடுத்துருக்காரே:-)



இந்தப் பதிவு நம்ம  வடுவூர் குமாருக்கு சமர்ப்பணம்.

  மேலே உள்ள இரண்டு படங்களும் நம்ம ஜிஎம்பி ஐயாவின் ஐயம் தெளிவிக்க:-)